በዱባይና ሰሜን ኤምሬቶች የኢትዮጵያ ኮሚኒቲ ማኅበር በበጎ አድራጎት ሥራዎች በጋራ ለመስራት አሜሪካ ከሚገኝ People to People (P2P) Bridge ከተባለ ማኅበር ጋር የመግባቢያ (MOU) ስምምነት ተፈራረመ!

ጥቅምት 20 ቀን 2018 ዓ.ም (October 30, 2025) በዱባይና ሰሜን ኤምሬቶች የኢትዮጵያውያን ኮሚኒቲ ማኅበር እና በአሜሪካ ከሚገኝ People to People (P2P) Bridge በተባበሩት አረብ ኢምሬትስ እና በአገር ቤት የሚኖሩ ኢትዮጵያውያን እና ትውልደ ኢትዮጵያውያን የሚጠቅሙ የጤና፣ የትምህርት እና የማህበረሰብ ልማት ስራዎችን በጋራ ለመስራት የመግባቢያ (MOU) ስምምነት ተፈረመ፡፡

በፊርማ ስነ-ሥርዓቱ ላይ በዱባይና ሰሜን ኤምሬቶች የኢ.ፌ.ዲ.ሪ ቆንሱል ጄኔራል ጽ/ቤት ተ/ጉዳይ ፈጻሚ አቶ አስመላሽ በቀለ ፣ በዱባይና ሰሜን ኤምሬቶች የኢትዮጵያውያን ኮሚኒቲ ማኅበር ሊቀመንበር አቶ ኢድሪስ ቡንስሮ፣ People (P2P) Bridge ማኔጅመንት ሊቀመንበር ዶ/ር አንተነህ ሀብቴ እና የማኅበሩ አመራር ቦርድ አባላት እና ዲፕሎማቶች ተገኝተዋል፡፡

በዱባይና ሰሜን ኤምሬቶች የኢትዮጵያውያን ኮሚኒቲ ማኅበር ሊቀመንበር አቶ ኢድሪስ ቡንስሮ እንደገለጹት የኮሚኒቲ ማኅበሩ ከተቋቋመ ከሁለት አስር ዓመታት በላይ የሆነው መሆኑንና በዋናነት የተቋቋመው በዱባይ እና ሰሜን ኤምሬቶች የሚኖሩ ዜጐችን ለሚደርስባቸው የመብት ጥሰትና የፍትህ መጓደል ድጋፍና ክትትል ማድረግ እንዲሁም ከመሠረታዊ የዜጎች አገልግሎት ባሻገር ማኅበሩ በሀገር ገጽታ ግንባታና ልማታዊ ሥራዎች ላይ ከፍተኛ ሥራ እየሰራ መሆኑን ገለጻ አድርገዋል፡፡

እንዲሁም ዶ/ር አንተነህ ሀብቴ People to People (P2P) Bridge በአሜሪካ ከተመሰረተ ከ25 ዓመታት በላይ እንደሆነውና በአገር ቤት ለሚኖሩ ኢትዮጵያውያንና ትውልደ ኢትዮጵያውያንን በበጎ ሥራዎች ላይ ከፍተኛ ድጋፍ እያደረገ መሆኑን ገልፀዋል፡፡

በፊርማ ሥነ-ስርዓቱ የማጠቃለያ መልዕክት ያስተላለፉት አቶ አስመላሽ በቀለ ቀጣይ በሁለቱም ማኅበራት በኩል በጋራና በትብብር የሚሰሩ የበጎ ሥራዎች ተጠናክሮ መሰራት እንደሚገባ አሳስበዋል፡፡